Да здароўя праз веды

30.4.2013
 
Арганізавалі спаборніцтва ўпраўленне адукацыі Брэсцкага аблвыканкама і абласны цэнтр гігіены, эпідэміялогіі і грамадскага здароўя.
         - Пытанні, звязаныя са здаровым ладам жыцця, заўсёды актуальныя, - адзначыў на адкрыцці алімпіяднага марафону першы намеснік начальніка абласнога ўпраўлення адукацыі А.Ф.Жук. – Радуе, што сучасная моладзь у пераважнай большасці аддае перавагу здароваму ладу жыцця, што дазваляе быць ёй максімальна карыснай грамадству. Алімпіяда дапамагае задумацца пра самую вялікую каштоўнасць у жыцці – уласнае здароўе і здароўе сваіх родных. Галоўнае, каб кожны з удзельнікаў спаборніцтва абавязкова прымяняў атрыманыя веды ў адносінах да сябе, адначасова прапагандуючы здаровы лад жыцця і сярод равеснікаў.
         Нягледзячы на тое, што курс “Здаровы лад жыцця” выкладаецца ў навучальных установах факультатыўна, важнасць і неабходнасць профільнай алімпіяды бясспрэчная, паколькі такая форма работы павышае цікавасць вучняў да ўласнага здароўя, садзейнічае актывізацыі пазакласнай і пазашкольнай дзейнасці па фарміраванні пазітыўнага ладу жыцця моладзі, прапагандуе карысныя веды сярод падрастаючага пакалення.
         Абласному спаборніцтву папярэднічалі школьныя і раённыя (гарадскія) алімпіяды, якія адабралі найбольш дастойных вучняў 8 і 10 класаў, а таксама навучэнцаў ПТНУ. Сёлета ў Брэст з’ехаліся 76 удзельнікаў. Многія алімпіяднікі прыязджаюць на спаборніцтва ўжо не першы раз, што сведчыць пра ўсвядомлены выбар актыўнай жыццёвай пазіцыі.
         Алімпіяда праходзіла на базе сярэдняй школы № 18. На працягу чатырох гадзін удзельнікі інтэлектуальнага спаборніцтва выконвалі шэраг тэарэтычных тэставых заданняў, якія тычыліся ролі раслін і грыбоў у жыцці чалавека, рацыянальнага харчавання, валеалогіі, прафілактыкі тытунекурэння, СНІДу і інфекцый, што перадаюцца палавым шляхам, а таксама ўжывання псіхаактыўных рэчываў. У цэлым, па словах членаў журы, алімпіяднікі паказалі даволі высокі ўзровень падрыхтоўкі.
         Для школьнікаў была арганізавана экскурсія на ААТ “Савушкін прадукт”, дзе яны пазнаёміліся з тэхналагічным працэсам вырабу прадуктаў здаровага харчавання.
         Дыпломы І ступені атрымалі Яна Таточка з сярэдняй школы № 20 Брэста, Ірына Воўк з гімназіі Драгічына і Мікалай Домін з Белаазёрскага дзяржаўнага ПТК электратэхнікі.

Сяргей ГРЫШКЕВІЧ.